सबै भन्दा धेरै आयकर तिर्ने रेमिट कम्पनी बन्याे आईएमई, चौथो पटक सम्मानित

खबर खुराक

काठमाण्डौ, २० चैत । आईएमई रेमिट रेमिट्यान्सतर्फ सबै भन्दा धेरै आयकर तिर्ने कम्पनीका रूपमा सम्मानित भएको छ । आन्तरिक राजस्व विभागद्वारा बिहीवार आयोजित एक कार्यक्रमकाबीच अर्थ मन्त्रालयका राजस्व सचिव रामशरण पुडासैनीले आईएमई ग्रुपका अध्यक्ष चन्द्रप्रसाद ढकाललाई यो सम्मान प्रदान गर्नुभएको छ ।

गएको मङ्सिरमा कर दिवसको उपलक्ष्यमा यसको घोषणा गरिए पनि कोभिड–१९ कारण कार्यक्रमहरू गर्न प्रतिबन्ध लगाइएकाले सम्मानको कार्यक्रम औपचारिक रूपमा हुन सकेको थिएन । आन्तरिक राजस्व विभागले कर दिवसका अवसरमा गएको मङ्सिरमा सबैभन्दा बढी कर तिर्ने १५ करदातालाई सम्मान गरेकोमा यो सूचीमा आईएमई रेमिट क्षेत्रमा पहिलो कम्पनीमा पर्न सफल भएको हो ।



यस अघि आईएमईले लगातार तीन पटकसम्म यो सम्मान पाइसकेको छ । नवौँ राष्ट्रिय कर दिवसका अवसरमा बिहीवार आईएमईसहित ती कम्पनीलाई सम्मान प्रदान गरिएको छ । आईएमई विदेशबाट बैंकिङ च्यानलमार्फत नेपालमा रेमिट्यान्स भित्र्याउने नेपालको पहिलो कम्पनी हो ।

नेपालको रेमिट्यान्स क्षेत्रको यो अगुवा संस्थाका कारण वैदेशिक रोजगारीमा गएका लाखौँ नेपालीलाई आफ्नो घरमा पैसा पठाउन सजिलो भएको छ । स्थापना देखि नै रेमिट्यान्स सेवालाई प्रत्येक नेपालीको पहुँचसम्म पुर्‍याउन प्रतिबद्ध यस कम्पनीले सेवा शुभारम्भको २० औँ वर्षसम्ममा नेपालका सहरी तथा ग्रामीण क्षेत्रलाई समेट्ने गरी दुई सय २५ आईएमई सेन्टरसहित ७७ जिल्लाका झण्डै १२ हजार सब–एजेन्ट र बैंक तथा वित्तीय संस्थाका शाखामार्फत सेवा दिइरहेको छ ।

Leave a Reply

Your email address will not be published. Required fields are marked *