काठमाडौंको सबै वडामा डाक्टर, नर्स र इन्जिनियर नियुक्त गरिने, खाद्यपदार्थको गुणस्तर परीक्षणका लागि विज्ञ नियुक्ति हुने

काठमाडौं भाद्र  १२,काठमाडौं महानगरपालिकाले ३२ वटै वडामा एमडीजीपी डाक्टर र नर्स राख्ने भएको छ । आइतवार बसेको नगर कार्यपालिका बैठकमा मेयर बालेन्द्र साहले सबै वडाहरूमा एमडीजीपी डाक्टर र नर्स राख्ने प्रस्ताव गरेका थिए । बैठकले मेयरको प्रस्ताव अनुमोदन गरेको छ ।

काठमाडौं महानगरको ३२ वटै वडामा वडा क्लिनिक सञ्चालनका लागि ३२ जना एमडीजीपी डाक्टर र ३२ जना नर्स करार सेवामा राख्न लागिएको बालेनले बैठकमा बताएका थिए ।

काठमाडौं महानगरपालिकाको वडाहरुमा हुने विकास निर्माण कामको अनुगमनका लागि ३२ वटै इन्जिनियर राख्ने प्रस्ताव पनि मेयर साहले राखेका छन् ।

त्यसबाहेक, काठमाडौं महानगरभित्रको बजारमा बिक्री वितरण हुने खाद्यन्न, तरकारी र फलफूलको गुणस्तर परीक्षणको लागि पाँच जना फुड टेक्नोलोजी विज्ञ पनि करार सेवामा राख्ने प्रस्ताव काठमाडौं महानगरको कार्यपालिका बैठकले अनुमोदन गरेको छ ।

रातोपाटी