ज्ञानेन्द्रलाल प्रधान र गुरु न्यौपानेले सेयरको अवैध कारोबार गरेको ठहर, कारबाही गर्ने बोर्डको निर्णय

प्रधानले कम्पनीको अध्यक्ष पद छाड्नसाथ नियम विपरीत श्रीमती, छोरा र छोरीको नाममा रहेको ६ करोड रुपैयाँभन्दा बढी मूल्यको सेयर बिक्री गरेका थिए । रिडी पावरका अध्यक्ष रहँदा न्यौपानेले १९ चैत २०७७ देखि ४ भदौ २०७८ सम्म रिडी हाइड्रोपावरको २८ हजार ९५३ कित्ता सेयर किनेर ३९ हजार २२३ कित्ता सेयर बेचेका थिए ।

बोर्डले न्यौपाने आफैंले र उनको परिवारका सदस्यले उक्त कम्पनीको सेयर दोस्रो बजारमा कानून विपरीत बेचेको भन्दै ६ पुस २०७८मा नै कारबाही सिफारिस प्रतिवेदन बुझाएको थियो ।

धितोपत्र दर्ता निष्कासन नियमावली अनुसार ‘कुनै पनि सूचीकृत कम्पनीको सञ्चालक, कार्यकारी प्रमुखलगायतका पदाधिकारीहरुले पदमा रहँदा वा पदबाट हटेको १ वर्षसम्म आफ्नो वा आफ्नो परिवार र आफू संलग्न कम्पनीमार्फत् त्यस्तो कम्पनीको सेयर खरिदबिक्री गर्न नपाइने व्यवस्था’ छ ।

प्रधान र न्यौपानेलाई धितोपत्र ऐनको दफा १०१ अनुसार कारबाही प्रक्रिया अघि बढाइएको छ । स्पष्टीकरण लिएपछि धितोपत्र ऐनअनुसार कानुन विपरीतको कारोबार गरेको आधारमा जरिवाना हुनेछ ।

‘त्यति मात्रै हैन, उहाँहरुले धितोपत्रको भित्री कारोबार (इन्साडर ट्रेडिङ) गरे/नगरेको विषयमा पनि बोर्डले अनुसन्धान अघि बढाएको छ, त्यसका लागि तहकिकात अधिकृत समेत तोकेर ४५ दिनभित्रै प्रतिवेदन दिन भनिएको छ,’ बोर्ड स्रोतले भन्यो, ‘सूचना चुहाएर कारोबार गरेको पुष्टि भएमा उहाँहरुलाई कैद सजायसम्म हुनसक्छ भने १० वर्षसम्म पब्लिक सञ्चालक बन्न नपाउनेसम्मको कारबाही हुन सक्छ ।’