अर्थमन्त्रालयमा वार्तापछि व्यवसायीहरूको आन्दोलन स्थगित

केही दिनदेखि आन्दोलनरत व्यवसायीहरूले बुधबारबाट आन्दोलन स्थगित गर्ने निर्णय गरेका छन्।

बुधबार नेपाल उद्योग वाणिज्य महासंघकी पूर्वअध्यक्ष भवानी राणाको नेतृत्वमा विराटनगर, मोरङ लगायतका व्यवसायीहरू र अर्थमन्त्री विष्णु पौडेलबीच भेट वार्ता भएको छ।

‘वार्ता सकारात्मक रह्यो,’ महासंघकी पूर्वअध्यक्ष राणाले भनिन्,’आजबाट जिल्लाहरूमा भइरहेको आन्दोलन समेत स्थगित गरेका छौं, अर्थमन्त्री ज्यूले पुसभित्र हाम्रो मागहरू सम्बोधन हुने आश्वासन दिनुभएको छ।’

व्यवसायीहरूले कात्तिकदेखि राष्ट्र बैंकले कार्यान्वयनमा ल्याएको चालु पुँजी कर्जा सम्बन्धी व्यवस्थाको कार्यान्वयन तत्कालको लागि रोक्नु पर्ने माग राखेका थिए।