जनार्दन शर्माले ‘संरक्षण गरेका’ पृथ्वी शाहको दर्जनौँ कम्पनीका नाममा शंकास्पद कारोबार

खबर खुराक
खबर खुराक २४ पुष २०७९, आईतवार
3 Min Read
Aa

काठमाडौं । नेपाल प्रहरीको केन्द्रीय अनुसन्धान ब्युरो (सीआईबी)ले विदेशी नागरिकबाट रकम ठगी गरेको आरोपमा व्यवसायी पृथ्वी शाहसहित ६ जनालाई पक्राउ गरेको छ । ३५ वर्षीय शाहसहित विजयविक्रम शाह, चक्रबहादुर खत्री, अनुप खड्का, रूपमांगत काफ्ले र रंगबहादुर साउदलाई नियन्त्रणमा लिइएको हो ।

पृथ्वी अछाम घर भई काठमाडौंको चाबहिलमा बस्दै आएका थिए । जनार्दन शर्मा अर्थमन्त्री हुँदा अमेरिकाबाट स्रोत नखुलेको रकम नेपाल ल्याएको आरोप उनीमाथि लाग्दै आएको छ । उनको समूहले स्रोत नखुलेको ६८ करोड रुपैयाँ नेपाल भित्र्याएको प्रारम्भिक अनुसन्धानबाट खुलेको छ ।

अमेरिकाको वित्तीय अपराध निवारणमा काम गर्ने संस्था फिन्सेनले नेपालमा शाहले भित्र्याएको रकमबारे अनुसन्धान गर्न अनुरोध गरेको थियो । शाहले अमेरिकाबाट ल्याएको रकमको स्रोत नखुलेको भन्दै बैंकले निकासा गरेको थिएन । तर, तत्कालीन अर्थमन्त्री शर्माले नेपाल राष्ट्र बैंकलाई दबाब दिएर निकासा गर्न भनेका थिए ।

राष्ट्र बैंकले शर्माले दिएको दबाब मानेको थिएन । सो दबाब नमान्दा अर्थमन्त्री शर्माको राष्ट्र बैंकका गभर्नर महाप्रसाद अधिकारीसँग सम्बन्ध बिग्रिएको थियो ।

सीआईबीका एक अधिकारीका अनुसार शाहले कम्पनी रजिष्ट्रारको कार्यालयमा दर्ता भएको त्रिपुरेश्वर हन्टिङ रिभर्स अफ नेपाल प्राइभेट लिमिटेडसहित दर्जनौँ कम्पनीहरूका नाममा शंकास्पद कारोबार गरेको देखिएको छ ।

प्रारम्भिक अनुसन्धानका क्रममा सम्बन्धित निकायहरूबाट कारोबार गर्ने अनुमति प्राप्त नगरी कम्पनीहरू सञ्चालन गरेर आर्थिक कारोबार गरेको, कम्पनीको उद्देश्यभन्दा फरक प्रकृतिका कार्यहरू गरेको पाइएको छ ।

एक अमेरिकी नागरिकसँग ‘एन्टी भाइरस’ नवीकरण गर्नका लागि भन्दै सम्पर्क स्थापित गरी उनको कम्प्युटरमा पहुच पुर्‍याई एन्टी भाइरस नवीकरणबापतको रकम पठाउनु भन्दै झुक्याएर उनको खाताबाट अमेरिकी डलर ट्रान्सफर गर्न लगाएको पनि अनुसन्धानका क्रममा खुलेको छ ।

सीआईबीका एक अधिकारीका अनुसार अरू विदेशी नागरिकलाई विश्वासमा पारेर ४६ लाख ४६ हजार ७३७ अमेरिकी डलर, १२ हजार ८२५ पाउन्ड स्टर्लिङ र तीन करोेड २२ लाख २८ हजार ६८० रुपैयाँ रकम प्राप्त गरी गैरकानुनी तवरले आर्थिक लाभ प्राप्त गर्ने उद्देश्यले ठगी गरेको पाइएको छ ।

शाहलगायत सञ्चालन गरेका विभिन्न कम्पनी तथा व्यक्तिहरूका बैंक खाताहरूमा सो रकम जम्मा हुनासाथ प्राप्त रकमको स्रोत लुकाउने उद्देश्यले अन्य विभिन्न व्यक्ति तथा संस्थाहरूको खातामा ट्रान्सफर गरी ठगी गरेको अनुसन्धानमा खुलेको छ ।

सीआईबीका अधिकारीहरूका अनुसार यो घटनामा थप पाँचजना उच्च निगरानीमा छन् । उनीहरूको खोजीकार्य जारी छ ।

एक अधिकारीले बाह्रखरीसित भने, “हामीले लामो अनुसन्धानपछि उनीहरूलाई पक्राउ गरेका हौँ । अवैध कारोबारका प्रमाण बलियोसँग जुटाएका छौँ । यो घटनामा दबाब आउने पूर्वजानकारी हामीलाई थियो । त्यसैले पहिले प्रमाण जुटाएर मात्रै अगाडि बढेका हौँ । घटनाको अन्य पाटो पनि हेरिरहेका छौँ ।”

प्रतिक्रिया दिनुहोस्