अस्ट्रेलियामा नेपाली खानाको प्रवर्द्धन गर्दै सेफ सन्तोष साह

७ फागुन काठमाडौँ ।  मास्टर सेफ सन्तोष साहले अस्ट्रेलियामा नेपाली खानाको प्रवर्द्धन गर्ने भएका छन् । नेपालको खाना प्रवर्द्धनका लागि अस्ट्रेलियन प्यासिफिक इन्टरनेशनल कलेज र प्यासिफिक हस्पिटालिटि एन्ड कुलिनरी एकेडेमी नेपालको संयोजकत्वमा आउँदो मे ३ देखि ७ सम्म ‘नेपाली फाइन डाइनिङ पप–अप इन अस्ट्रेलिया’ आयोजना हुने भएको हो ।

अस्ट्रेलियाको नेपाली रेस्टुरेन्टमा हुने कार्यक्रमको मेनुमा २० प्रकारका नेपाली खानाहरु खुवाइने भएको छ । मास्टर सेफ साहले तयार पार्ने खानामा हाँसको छोयला, साँधेको भोगटे, वरफ गोला, चिकेन म:म, सुकेको माछाको चट्नी, गुन्द्रुकको अचार, कोदोको खिरलगायतका खाना खुवाइने छ । साथमा नेपाली ऐला पनि खुवाइनेछ । खानाका लागि छिट्टै नै बुकिङ खोलिनेछ । टिकट मूल्य प्रतिव्यक्ति १८० देखि २०० अस्ट्रेलियन डलर तोकिएको छ । साथै एक दिनमा ५० जनालाई मात्र खुवाइने छ ।

कार्यक्रममा बोल्दै मास्टर सेफ साहले मेनुमा हिमाल, पहाड र तराई सबैको खाना समावेश गर्ने प्रयास गरेको बताए । यो खानाका लागि व्यक्तिले २ घण्टा ४५ मिनेट छुट्याउनुपर्छ । नेपाली खानाको प्रवर्द्धन तथा प्रचारप्रसारमा लागिरहेको बताउँदै साहले, ‘ नेपाली खाना मन पराएका छन् । लेखेर र बोलेरमात्र भएन अब विदेशीहरुलाई नेपाली खाना चखाउनु पनि पर्छ ।’

उनले केही महिनाअघि यूकेमा पनि नेपाली खाना चखाउन यस्तै कार्यक्रम आयोजना गरेका थिए । जसमा २ घण्टामै ६०० टिकट बिकेको थियो । उनले यूकेमा विदेशीहरुले देखाएको उत्साहले थप हौसला मिलेकाले यस्तो कार्यक्रम निरन्तर गरिरहने बताए । उनले भने, ‘म यस्तै कार्यक्रम मलेसिया, क्यानाडा, अमेरिकामा पनि गर्ने सोचिरहेको छु । विदेशीहरुले नेपाली स्वाद रुचाएका छन् । यस्ता कार्यक्रमले नेपाली खानाको प्रचारप्रसारमा सहयोग पुग्नेछ ।’

एकडेमीका इन्टरनेशनल डाइरेक्टर गणेश केसीले मास्टर सेफ साहसँग सहकार्य गर्न पाउँदा खुसी लागेको भन्दै यो कार्यक्रमले नेपाली खानालाई अस्ट्रेलियामा प्रचारप्रसारमा सहयोग पुग्ने विश्वास लिएको बताए ।