लुम्बिनी केबलकारमा पर्यटकको संख्या बढ्दो क्रममा , डेढ महिनामै ५ लाख भेटी संकलन

साउन ५ , रूपन्देही

लुम्बिनी प्रदेशको पहिलो लुम्बिनी केबलकारमा  डेढ महिनामा करिब  ४५ हजार पर्यटकले यात्रा गरेका छन् । आईएमई ग्रुपको मुख्य लगानी र स्थानीयको समेत लगानी रहेको लुम्बिनी केबलकार जेठ १५ गतेदेखि व्यावसायिक सञ्चालनमा आएको थियो भने जेठ २५ गते प्रधानमन्त्री पुष्पकमल दाहालले औपचारिक उद्घाटन गरेका थिए ।

करिब डेढ महिनाको अवधिमा  ४२०००  जनाले केबलकार चढेका र यस बाहेक विशिष्ट व्यक्तिहरू, कलाकार, सेलिब्रिटीहरु समेत गर्दा करिब ४५००० जना पुगेका लुम्बिनी केबलकार प्रालिले जनाएको छ । जसमध्ये  करिब ८८  प्रतिशत नेपाली, ७  प्रतिशत भारतीय र  अन्य तेस्रो मुलुकका  रहेका छन् । श्रावण र भदौको प्रत्येक बुधबार  बिहानीको ९ बजे देखि दिउँसो १२ बजेको  समयमा ५०% सम्म छुट दिईन थालेपछि  पर्यटकहरूको संख्यामा ह्वात्तै बढोत्तरी आएको हो । हाल बिहानीको समयमा टिकट दर नेपालीलाई रू  ३७५ र भारतीय लाई ३७५ भारू कायम गरिएको छ ।

त्यस्तै  केवुलकारको टप स्टेशन भन्दा माथि बसन्तपुरमा निर्माण गरिएको मा कामख्या मन्दिरमा सञ्चालनको डेढ महिनाको अबधिमा ५ लाख भन्दा बढि भेटी संकलन भएको छ । माकामख्या माता को दर्शनका लागि नेपाली तथा भारतिय तिर्थालुहरू बसन्तपुर आउने गरेको केवुलकारका सुरक्षा शाखाका प्रमुख पुर्व प्रहरी नायब निरिक्षक देउबहादुर चन्दले जानकारी दिए ।

केबलकारले बुटवलको वडा नंं ३ र तिनाउ गाउँपालिका–३ का वडावासी स्थानीय र विद्यार्थीलाई टिकटमा २५ प्रतिशत,सशस्त्र प्रहरीलाई २० प्रतिशत छुट दिएको छ भने जेष्ठ नागरिक,अपांगता भएकालाई पनि टिकटमा छुट दिएको छ । टप स्टेशनमा कामाख्या देवी मन्दिर, सय वर्ष पुरानो भगवतिको मन्दिर, भगवान शिवको वाहन नन्दी सहितका धार्मिक स्थल र घुमिफिरका लागि पर्याप्त ठाउँ र संरचनाहरु रहेकाले सञ्चालनमा आएको एक महिनामै उल्लेख्य संख्यामा पर्यटकहरु आएका प्रालिले जनाएको छ ।

२.६ किलोमिटर दुरीको केबलकारको टप स्टेशन समुन्द्री सतहबाट करिब तीन हजार फिट उचाइमा रहेकाले त्यहाँको हावापानी गर्मी मौसममा शीतल र जाडोमा न्यानो हुने भएकाले आन्तरिक र भारतीय पर्यटकको लागि आकर्षक गन्तव्य बनेको छ । टप स्टेशनमा एक अर्ब ५० करोड लागतमा १५० कोठा, क्यासिनो, एक हजार जना क्षमताको बैंक्वेट हल र स्वीमिङ पुल सहितको पांचतारे होटेल बन्ने प्रक्रियामा रहेको  जानकारी त्यहाँ कार्यरत एक कर्मचारीले दिए।

केबलकारको प्रत्येक टिकट शुल्कको २ प्रतिशत रकम बुटवल उपमहानगरपालिका र तिनाउ गाउँपालिकाले एक–एक प्रतिशत पाउने गरी सम्झौता भएको स्रोतले जनाएको छ । नेपालमा सञ्चालनमा रहेका ६ वटा मध्ये दोस्रो लामो लुम्बिनी केबलकारको टिकट दर नेपालीका लागि  ७५० रुपैया र भारतीयका लागि ७५० भारु रहेको छ ।

केबलकारले प्रत्येक टिकट मूल्यको एक–एक प्रतिशत रकम दुई वटा स्थानीय तहलाई दिने भएकाले यसबाट बुटवल उपमहानगरपालिका र तिनाउ गाउँपालिकाको दीर्घकालीनरुपमा विकासमा ठूलो योगदान पुग्ने तिनाउ गाउँपालिकाका अध्यक्ष प्रेम श्रेष्ठले बताए ।