नेपाली काँग्रेस बडिमालिका नगर कार्य समितिद्धारा विपीको स्मृतिमा वृक्षारोपण

नगरकार्य समितिले पार्टी कार्यालय तथा विपी स्मृती भवनमा विपिको फोटोमा अविर माल्यार्पण सहित विपी स्मृती भवनको परिसर भित्र वृक्षारोपण पनि गरेको हो ।

कार्यक्रममा बोल्दै नेताहरुले विपीको आर्दश र मार्गदर्शनलाई नेतृत्वले अनुसरण गर्न नसकेको गुनासो गरे । विपीको संघर्ष, योगदान र आदर्श चरित्रबारे पार्टीले नयाँ पुस्तालाई जानकारी दिन नसकेको भन्दै उनीहरुले त्यसतर्फ नेतृत्वको ध्यानाकर्षण गराएका छन् ।

नेपाली काँग्रेस बाजुराका निवर्तमान पार्टी सभापति कविराज पण्डितले विपी दर्शन र उनको प्रजातान्त्रिक समाजवादलाई नर्बिसेको बताए । उनले विपीको आर्दशको धरातल, नैतिकता तथा त्याग र तपस्याको अवस्था अहिले नरहेको भए पनि पार्टी सिद्धान्तबाट विचलित नहुने स्पष्ट पारे । उनले सामूहिक नेतृत्व भन्दा व्यक्तिवादी नेतृत्व र चरित्रको हावीले पार्टीलाई आक्रान्त पारेको भने स्वीकार गरे ।

- Advertisement -

विपीका विचारधारालाई नया पुस्तामा पुर्याउने दाहित्व नेपाली कांग्रेसको रहेकाले जनताको माझ लैजान जनसमक्ष लैजान संकल्प गर्नुपर्ने बताए । कार्यक्रममा उपसभापती पदम बडुवाल,निवर्तमान पार्टी सभापती कविराज पण्डित,काँग्रेस बडिमालिका नगर सभापती गोपाल कार्की लगायत जिल्ला कार्यसमिती पदाधिकारी,भातृ संगठनका पदाधिकारी ,सुभेच्छुक सस्थाका पदाधिकारी लगाएतको सहभागिता रहेको थियो ।

मुलुकमा प्रजातन्त्रको स्थापनाका लागि आजिवन संघर्ष गरेका आफ्ना संस्थापक नेता विपी कोइरालाको २०३९ साल साउन ६ गते निधन भएकाले नेपाली कांग्रेसले वर्षेनि साउन ६ गतेको दिनलाई विपी स्मृति दिवसको रुपमा मनाउने गरेको छ ।